Rrudhat –metamorfoza e lëkurës sonë

Njeriu nuk mund të ketë një pasqyrë magjike që me anë të një butoni të shtypur të reflektoj çdo ndryshim të tijin nga dita në ditë, nga viti në vit, deri në pjesët më milimetrike të trupit. E vetmja pasqyrë me të cilën ne e shikojmë veten dita ditës është pasqyra e lëkurës së trupit. Me këtë metamorfozë tonën kuptojmë ndryshimet, transformimet, përjetojmë frikërat tona, ndjesitë e viteve dhe kalimet e fazave. Nëse ka një fazë të jetës e cila për një pjesë të madhe të njerëzve përbën frikë është faza e plakjes dhe rrudhat janë një tregues i rëndësishëm i moshës dhe ikjes së viteve. Me kalimin e kohës, lëkura humb shtresat e yndyrës dhe prodhimi i kolagjenit dhe elastinit ngadalësohet. Rrudhat e para fillojnë të shfaqen në fytyrën e një personi kur lëkura fillon të paloset natyrshëm gjatë mimikave dhe shprehjeve të fytyrës si përshembull të buzëqeshurit, të vrenjturit e fytyrës apo tipare të rrudhosjes së fytyrës. Kjo ndodh për arsye se lëkura bëhet më e hollë dhe më pak elastike me kalimin e kohës.

Disa nga shkaktarët e formimit të rrudhave i atribuohen këtyre faktorëve:

• Ekspozimi ndaj diellit
• Duhanpirja
• Dehidratimi
• Llojit të lëkurës (njerëz të cilët kanë pigment lëkure të çelët dhe sy blu)
• Shprehjeve faciale të përsëritura të fytyrës
• Trashëgimia (faktori gjenetik)

Rrudhat nuk mund ti ndalojmë, por mund të tentojmë ti parandalojmë dhe disa nga trajtimet kundër rrudhave që përdoren janë:

• Përdorimi i vazhdueshëm i produkteve kundër plakjes siç janë: kremra të natës dhe kremra të syve, të cilat përdoren në të dyja kategoritë; ato të parandalimit të rrudhave dhe ato të minimizimit të rrudhave gjatë shfaqjes në fytyrë.
• Përdorimi i acidit të Vitaminës A (Tretinoin, Retin A, Renoval)
• Acidet Alfa-hidroksi ose të njohura si ‘acidet e frutave’ dhe përmbajnë acidin glikolik dhe laktik
• Antioksidantë (që përfshijnë vitaminën A, C dhe E si dhe beta-karoten)
• Hidratues të zakonshëm
• Përdorimi i lazerit (për vendosje kolagjeni në fytyrë)
• Kirurgjia plastike (Liftet e fytyrës, të vetullave)
• Terapia Ultrasound
• Injeksione (Botox)
• Microdermabrasion

Disa nga këshillat që rekomandohen për të parandaluar rrudhat:

• Kujdes në marrjen e rrezeve të diellit
• Ndjekja e një diete të shëndetshme
• Reduktimi i sheqerit
• Qëndroni të hidratuar
•  Konsumim i ulët i alkoolit
• Bërja e ushtrimeve fizike dhe terapive të Jogës, meditimit
• Reduktoni nivelin e stresit

 

Farmaci Dite e Nate ,

Tue, 12 Jan 2021 00:00